Zvončeki složno si cinkaju,
Fletno nam sane letiju,
Lugi vu snegu se stiskaju,
Zvezde se dalke blišćiju.
V nebu sigurno su ajngeli,
Skrili od zime se hude.
Ruke na zvezdah topiju si,
Nemreju pazit na ljude.
Vsikud su puti vre zbrisani,
V belih perikah aleje,
Zvončeki veselo cinkaju,
Kak da se negdo to smeje.
Samo nad cmroki, nad črnimi
Kmica kak stena se diže.
– Naj se ne dostoju bojati,
Naj se primekneju bliže!
– Vani smo. – Zakaj se srdiju,
Gdo nas je videl? Smo sami.
Morti taj mesec nad brezami?
Ves je črlen, – naj se srami!
Kaj je to? Kak me zasipalo,
Kmica i sneg mi prek oka,
Kaj su to Oni, markizica,
Ili su svrži od cmroka?!
Stari nas grabri s perikami
Nekak glediju ze strane,
Zvončeki glasno se smejeju,
Fletno letiju nam sane.
Zbirka: Kipci i popevke
Objavljeno: 1917.
Odgovori