Vu snu vendar mi dohađa
ka mi Ljubav mu narađa.
Batrive mi muke me
Daj pravicu, Ljubav! tvoju,
Istinskešu senju moju
Včini; al ne zbudi me.
Nut pri jednom pustom zdencu,
Polek dreva istom vencu,
Kate senjam od Tebe.
Senjam, ali tak da štimam,
Da ni senja, neg da imam
Pravu Kate pri mene.
Cverčat ptice: teči vode:
Čumet listje; ter da hode
Vidim Kate noge Tve.
Od bistrine Oka Tvoga,
Trepetanje Serca moga,
Čutim polek navade.
Kad Te vidim meni milu,
Bože! kakvu čutim silu?
Je li senja? da dvojim.
Drago kad prijemljem ime,
Kak reč Tvoja medeni me!
Ves v radosti se gojim.
Ah da vidiš! kak se jasne,
Mile oči, ter kak hasne,
Za lepotu zvisiti.
Ka si vsigdar mi ne mila,
Ne bi nigdar me merzila,
ki Te moram ljubiti.
Kakov jesem ovak ostal?
Vu kakovi Misli postal?
I kaj onda rekel sem?
Ni mi moči zgovoriti;
Neču vendar to tajiti,
Da Tve ruke prijel sem.
Niti mleko ni beleše,
Neg Tve ruke naj čisteše,
Stokrat ove kušnul sem.
Ti si farbu premenila,
V licu si se zrumenila,
Zmoknule su oči Tve,
Ali nut! gda naj menj štimam,
Jalnoga Filena imam
Svedoka tadbine me.
Ov me splaši, serce zmuti,
ko zakipi, zdersnuč zbudi,
Kratka radost! prošla je.
Je, je prešla kakti tenja,
Ljudi radost! moja senja,
Žar moj s tenjum prešel ni.
Ako kakvu radost daje
Senja, kak pak den postaje,
Me terplenje ponovi.
Odgovori