Na nebu se obesil –
kak črni i podrapani
pun lukni škrlak –
jen velik i ves od snega
oblak…
Z vetrom se je boril –
na hiže je sipal sneg,
gda se naglo vmoril;
zabelil se dol i breg…
Sigde su zvezdice bele, i bleskale su se…
a zemla je bila lepa kak pun biserja dlan;
Mesec se smeškal, i ni bil žut
vre zlat –
gda denes je Bajdni dan…
Rodil se brat,
rodil se Boži Sin –
zato zvoniju zvoni vsi,
na ves glas…
. . . . . . . . . . . . . . . . . . . .
Po putu dečica gredu – su bleda,
i dršću od zime lute,
a jedno okno se svetli i gleda
na snežne pute…
Bratec je stal na štengu,
je drhtal i zapopeval,
a sestrica mu je pomogla,
i z nom je suze proleval…
Lepo su, lepo popevali
o detešcu malom vu štali;
na slami
se rodil…
i kako je zlatni trak zvezde
tri krala k Njemu sprovodil…
i javil se onda angelov glas
pastirima z popevkom:
Rodil se Spas…
…Onda su dečica stala,
najmanja je seka zaspala –
Vu čudu su gledali v sobu;
na oknu je bor
i čuli su ajngela kor
da popeva onu istu popevku…
Kako bi bili sretni da su vu hiži,
da su nutri, kaj im za Isusom malim
za popevkom pod borom dušica teži…
I onda bi sretni bežali doma,
i nosili bi bože dare mami,
kaj betežna leži…
Vu hiži je bakica jena,
i dedek stari i beli,
pa su spružili kolena,
se digli – i vun črez okno gledeli…
Z rukami su mahali
i dečicu ozeblu zvali –
pa su ih grejali, kuševali
i darov im puno dali…
I mamicu su dopelali,
i srećni onda popevali…
Starci su blaženi bili,
Isus se i njih je setil;
hižicu slamom pokritu
z dari, z decom posvetil…
A dečica su pak popevala
z mamom, bakom i z dedom
… o detešcu malom vu štali,
na slami
se rodil…
i kako je zlatni trak zvezde
tri krala k Njemu sprovodil…
i javil se onda angelov glas
pastirima s popevkom:
Rodil se Spas…
Objavljeno: 1930.
Odgovori