Zvonček je s turna našega zvonil,
plovan polehko popeval –
vetrek po nebu oblake gonil,
nigdo ni suze proleval…
Starček je vumrl, imel je bradu
ko svetec v oltaru belu,
Navek se smejal, ni znal o jadu,
rado ga imali v selu.
I gda je ležal mrtev na stolu
ko rožica mala i bleda,
ni traga smrti ni kakvom bolu –
navek se smeška i gleda…
… Imel je ženu, ali je vmrla,
a tako je dobra bila!…
Tuga je život bakici strla
kaj se vu njoj je krila.
Imali negda lepeg su sina.
V tuje je kraje prošel –
Jokala za njim je domovina.
… Nigda ni nazad joj došel…
Dalko je, dalko prešel prek mora
gde zlato se v grudam vadi.
Pisali su joj: Velka je gora
strla mu životek mladi…
Jokala dugo, jokala mati:
“Vsega pri hiže nam ima,
njive i polja, grožđe za brati, –
a sineka našega nima!…”
Jednega dana vgesla je ona…
a starček za strugom šepal –
i gda su zajdna zvonela zvona,
lepe molitve je tepal…
Čekal je dane, tiho, veselo,
bliža postala daljina…
Zato se smeškal ko nebo belo:
… Videl je ženu i sina!…
Zvonček je s turna našega zvonil,
plovan polehko popeval –
vetrek po nebu oblake gonil,
nigdo ni suze proleval…
Objavljeno: 1930.
Odgovori