Il disinganno
Nekaj si napisal za ljubav nekakvu,
ku ja nikak ne znam, nit ne pozna(m) takvu.
Kak to reči moreš da sem te ostavila?
Vem se s Tobum nisem ja nigdar ni spravila.
Žal mi je da ljubav ka ti stalna bila,
Po nesreči s Tugum je se zamenila.
Ako te je ljubav takva veselila
Štimam da tva čednost to ni vredna bila.
Pišeš; da si stalnu ljubav mi pokazal
S tem hteč reči, da si veru mi prikazal
Niti sem ku ljubav pri tebi ja vidla
Nit podatu veru od tebe gda zdigla
Kak me tvorit moreš, da ti serce ranim,
kada se ja sili serca tvoga branim?
Ne ne moja misel, da ko serce ranim,
Samo ljublenomu sužanstvu se branim:
Nit se hasni tužit, da nimaš milošče:
Ne be se nju trošit imal bi nju jošče.
Ja te za nju nemrem nikakor pomoči;
Ar je samoj treba Milost vu dne v noči.
Zato ma je dužnost poštuvat vsakoga;
Ar ni znat kak milost deli se od koga.
Zato te kerv tvoja niš naj ne zapeče,
kad vidiš da lestor gdo se z menum šeče.
Ni se treba čudit, da se koji besi;
kajti cena njegva v drugeh ceni leži.
Cvetek fijolicu ljudi malo cene,
Cena njoj pogine berže li povehne.
Kad za Golubicu Golub več ne mari,
Lahko Golubica s drugemi se spari.
Odgovori