Noć, ti moja temna noćka,
Kaj mi to mučiš,
Za kaj si navek v črnini,
Kaj se žalostiš?
Zato morti, kaj si vidla
Čez tih puno let,
Kak trpi i kak pogiba
Ovaj bôgi svet?!
Kak mu nigde smilovanja
Niti mira ni,
I kak ipak živet mora,
Zakaj? Znaš li ti?
Ali ti si tiha zmirom.
Ne ćeš reći niš,
Noć, ti moja temna noćka,
Ti mučiš, mučiš.
Kaj ti one strašne tajne
Odat nam ne smeš?
Ili imaš preveć srca,
Ne ćeš da poveš?
Al zabadav nam je pitat,
Zgine pusta reč,
Senjom nam zakriješ oči,
Zmirimo se speć.
Najboljše je: niš ne pitat,
Spat pozabit vse.
To bi nam, ti moja noćka
Štela reć, kaj ne?!
Zbirka: Kipci i popevke
Objavljeno: 1917.
Odgovori