Sve mi nekak je denes
tako lepo, veselo –
a srce
kak ptičica z gajbe
v nebo bi zleteti htelo…
I letel bi, letel z lišćem,
i s ticami tiho popeval
i v potok bi, kaj brbla v šumi,
vesele popevke zleval…
I dečicu majhenu onu,
kaj bosa po mlakami gaze,
stisnul na srce bi svoje,
kušnul v blede obraze.
Lepo bi im pripovedal
i v oči bi njihove gledal.
A srce bi slušal kaj tuče
i usne kaj šepćeju vruće!…
I onda bi njih ja stiskal
sve bliže i bliže…
i rekel bi, kakove jesu
gospodske visoke hiže.
Svega pri njim je najti,
i lava kaj vodu štrca.
I svega je, svega najti,
samo ni toplega srca!…
Onda bi gledala mene
dečica drobna i mala,
a tiho bi, tiho i tužno,
jokati dečica stala…
Zakaj njihova mama
nema do neba hiže
i lava kaj vodu štrca?!…
Drobnoj bi dečici rekel:
“Zato, kaj ima srca!…”
Objavljeno: 1930.
Odgovori