Vtaži serce tvoje
Draga Kate prosti,
Falinge su moje
Još oredne milosti.
Zaisto prostoga
Hvalil sem se sada;
Ali, veruj, toga
Ne bude nikada
Prav je da zakriti
Htel sem plamen stari,
Za koga tajiti
Serdil sem se s kvari.
Če prem ime tvoje,
Nikaj me ne zmuti;
Kažu oči moje
Kak si serce čuti.
Vsigdir i v snu jesi
Na pamet mi vpala,
Ar i gde ti nesi,
Ma te misel mala.
Če mi dalko jesi
Sprot želim te bliže,
A kad blizu jesi,
Kaj ču želiti više?
Če te ne spominam,
Vse mi je netečno
Ništ’ v pameti nimam
Vse mi je nesrečno.
Ime tvoje zmirom
Na jeziku imam,
Z istem protivnikom
Z tebe se spominam.
Reči tve i oči
Jesu takve moči,
Da njim vu dne v noči
Branit ni se moči.
I zvan slasti tvoje.
Zapovedi volje,
Nikam serce moje
Ne giblje se bolje.
Prez tebe radosti
Ja nemrem imati,
Prez tebe žalosti
Vse mi hoče dati.
Ar s tobum ja ljubim
Gore i ledine,
I gde te počutim,
Nepovolnost zgine
Sada prav valujem,
Da ti lepa jesi:
Ter od serca čujem
Da nit s parom nesi.
Žal mi nigdar ne bu
Da sem te rad imal.
I gda v tvom pogledu
Lepotu sem štimal.
Ljubavi gda strelu
Hotel sem vlomiti,
Štimal sem da v telu
Serce mi če zgniti.
Ali s čem nevolji
Mojoj sem se branil,
Nis pomagal bolji
Pače sem se ranil.
Kakti goder Ptica
ka vu lepku vjeta,
Boreč sirotica
Jošče se zapleta.
S krelutjami trepčuč
Stergnut bi se rada,
Več se v lepku mičuč,
Več v sužanstvo pada.
Misli! da neda se
Plamen moj zatreti;
Niti da ne da se
Želja ma zapreti
Nagnenje nature.
Ljubavnike sili,
Povedat kak v hude
Vručine su bili.
Kude i vojaki
Vojske zla činjenja,
Idu vendar jaki
Na vojske znamenja
Verne se i sužen,
Misleči na muke,
Bežeč bolje ružen
Lanc od druge ruke
Če za te govorim
Sprot se zadovoljim
Naj bolj se pak borim
Kak se s tobum zvolim
Prosti prosim tebe,
Kaj nis rekel pravo,
Včini kaj češ z mene
Serce me bu zdravo.
Nestalnost vsu puščam,
Primi Serce verno!
Včinit’ ti dopuščam
Z menum vse kak pervo
Znaj da hočeš Kati!
Vernost v meni najti,
K kakvi Ciganici,
Ne pusti me zajti.
Odgovori