Na krče

Glicinije pak se zaplavile,
I slatko dišeć me pozdravile
I zabil sem dan i živlenje,
Pak mladosti došle su senje.

I z menom na prstih su hodile
I v kraj su med bregi me vodile,
Gde sunce, kak nigde je zlato,
Gde vse mi je drago, poznato.

Tam trni se meni vugibljeju,
I stare se sljive nagibljeju,
Diši mi senokoša ravna,
Mi zdavna se poznamo, zdavna.

Pastiri još ogenj si kuriju,
I šume vu dole se žuriju
I oblak beli se i zgine
Za one tak plave planine.

Tam tiči me drobni nazivaju,
Pred menom se steze ne skrivaju,
Tih polja sem dragal ja klase,
Tih tičekov poznam ja glase.

Kaj ne? sad se ne bumo delili,
Neg celi dan skup se veselili
I leteli v gaje i dole,
Pozabil bum brige i – škole…

– Al ceste vu draču vse stajeju
I cucki na mene tak lajeju,
I Krčim kad došel sem bliže;
Nî bilo dvorišća nit hiže.

I strajnski su muži se čudili:
“Kaj oni su gospon zabludili?
Tu nemreju dojti do sela,
Ta cesta već nikam ne pela!”

I mučal sem, moral sem vrnut se,
Nî srce mi dalo obrnut se,
I meni je bilo do plača,
Ti mrtva mi gruda domaća!

Zbirka: Kipci i popevke
Objavljeno: 1917.