Cinkuš je s turna našèga zvonil,
Plòvan polahko popêval,
Vetr po nebu oblake gonil, –
Nišće ní sôz prolêval.
Vmrl je star oča, brado je imal
Ko svet’c v oltaru belo,
Ko malo dete na odru se smejal,
Vesèlo bilo mu čelo.
Imal je ženo, ali je vmrla,
A tako dobra je bila!
Toga je život matere strla,
Kâ se vu nje je skrila.
Ljubìli negda lepèga so sina,
V tuje se kraje obrnil,
Kapàle soze so v kupìce vina
Nigdâr nazád se ní vrnil.
Dalek je, dalek proš’l prek mora,
Tam zlatna se zemlja prostrla,
Pisàli so ju: da zlatna je gora
Mladi mu život potrla.
Jokàla dugo, jokàla mati:
Sega pri hiše nam ima,
I šume, i njive, i grođe za brati,
A sinka našega nima.
Nàjempôt tako vg’sla je ona.
Za trugó stari je šepal, –
Dugo zvonèla zadnja so zvona,
Lepe molítve je tepal.
Čekal je dane tiho, vesèlo,
Bliža postála daljina –
Zato se smèjal ko nebo belo:
Videl je ženo i sina!
Cinkuš je s turna našèga zvonil,
Plòvan polahko popêval,
Nišče ní sôz prolêval.
Vetr po nebu oblake gonil, –
Objavljeno: 1929.
Odgovori