Mrak

Bele su breze tak blede,
Trusi po strni se mak,
Plave planine zastira
S črnimi kreljutmi mrak.

Steza se skriva pod preprut,
Grmje se stisnulo v kraj,
Kakti da čekaju nekaj
Doli, daljine i gaj.

Breze poslušaju blede,
Veter zatajil je dah,
Tajno kak rosa prek trave
Prešel je trepet i strah.

Tič je bez glasa preletel
K noći za breze tam prek. –
– Bog moj, kad zaspat bum moral,
Bum li ja spal za navek?..

Zbirka: Kipci i popevke
Objavljeno: 1917.