Veter je jokal vuz hiže
i v kmici je nihal veju –
gredu i strašno se smeju,
ludi se bliže i bliže…
Zekril sem oči – je dosti,
klimale glave se gole;
lukne bez oči su bole –
išle su sene od kosti…
Morti da zišli su z groba?
Goli su muški i žene…
Gledali z luknam su v mene
v polnočno vuzemno doba.
Mesec je lukal črez granje,
pod drevom dreči se cura…
Vujde – gda tukla je vura –
s križanja čist črno janje…
Veter je jokal vuz hiže,
tiral je kosti da jeju;
gredu i strašno se smjeju,
k gradu se bliže i bliže…
Objavljeno: 1931.
Odgovori