Našvavaš si, sneša našvavaš
Na platno te pisane niti,
Al nekak ti vedja se posel
I igli ti ne će se iti.
Razmata se pismo i puca
I platno ti puza vu krilo,
Po podu se prašnomu vleče,
Kaj nî ti ga lepoga milo?
Kaj glavu si v ruku naslanjaš,
Navek se obraćaš k obloku,
Glediš, je li oblak to došel,
Da tak ti je kmica vu oku?
Nî! Sunčece svetlo je vani,
Zlati se i žitek nam greje
I tičeke vsigde je čuti,
Iz vsake popevaju veje.
Jedina si ti sad žalostna,
Kaj oko ti stiha se plače?
Kak rubača k dragomu bu došla,
Kad suza vse delo razmače?!
Našvavaj si, sneša, našvavaj
Na rubaču pisane niti,
Al pašći se, dragi je v boju,
Prekesno bi moglo još biti!
Zbirka: Kipci i popevke
Objavljeno: 1917.
Odgovori