Na bregu cerkva jena,
Stara par vekôv,
Stojí vre zapuščèna, –
Sôv puna, šišmišôv.
Njeja je niska vrata
Pred smrt zaprl baron –
Ní vre golôbe v jata
Razgànjal smehom zvon.
Sè ajngele i svete
Je imat v reštu tel –
A majstor v lica, v krete
Veselje im je del.
V glavnèmu je oltaru
Anton, svet pustinjak –
V pobòžnem stojí žaru,
Ko grabancijaš-dijak.
Z jenó nogó je skočil,
Lepo se nasmejâl –
S palicó se podbočil, –
Da ne bi dole pal.
Do njega je Mikùla:
V roka mu zlat’n ščap,
Na glavé bela kula,
A brada mu ko slap.
I sveti Petr v kotu
Dignil velik ključ:
Ko da mu gdo na potu,
Pa tel bi š njim se tuč.
Tam fratr jed’n stari
Zatancal je, junak,
Ko da za greh ne mari
Je kuto dignil v zrak.
I ajngeli drvèni,
Krilam dajó mah –
Skačó preljubljèni,
Ní jî Boga strah.
I kada trak od sonca
Čez okno v cerkvo gre, –
Veselju nima konca –
To jako lepo je.
A Mojsiju na kipu
Od jada zras’l rog:
Vu tem se smešnem hipu
Nasmèjal stari Bog…
– O dobri, sveti ljudi,
Stišnjèni vu svoj kot –
Ljudské ste čisto čudi,
Rojèni baš za pot.
Ja znam, da vi bi teli
V beli, lepi svet,
Da tožne razvesèli
Vaš obraz, smešní kret.
Vàvêk bi potovàli,
Tiràli ljude v smeh -;
V birtije malo stali,
I ne bi bil to greh.
Odgovori