Grabrov prirezanih red,
Amor zmed listja na stupu
Nekak žalostno gledi
Praznu vu mehenu klupu.
Čisto pozabljen je on,
Pavuk mu prede prek čela,
Lasi posipal je prah,
V ruki pretrgnuta strela.
Senja on: Srebrena noć.
V spomenku ideju pari,
Tiha i sladka im reč,
Grabri si šuškaju stari.
Jeden zaljubljeni par
Došel je k njemu sim sedet,
Kmica ni videla niš,
Amor, – je sramil se gledet.
Zutra markiza ga ta
Z rožami vsega prekrila
K njoj bi on zletel bil štel,
Al su od mramora krila…
Gde su markizice sad?
Prešle su v noć s kavalirom,
Amor još čeka ih sam,
Čeka zabadav ih zmirom.
– Sad još debela gospa
S cuckom čez park se prepela:
Park i gospodski je grad
Kupil si kramar iz sela.
Zbirka: Kipci i popevke
Objavljeno: 1917.
Odgovori